ස්පෙයාවීලයක (Spare Weel) කතන්දරය!

romeo

෴ ජීවන්ති කෝසලා

වර්තමාන මිනිස් දිවිය කර්කශය, ඝෝෂාකාරීය. ඔවුන් සියල්ලෝම මහා තරගයක කොටස් කරුවන් පිරිසක්ව හැල්මේ දුවති. බොහෝ දෙනෙකුගේ රසනහර ඔවුන් විසින්ම කපා දමාගෙන තිබේ. තවත් පිරිසක් විකල්ප නොමැති කමින් විඳීම් අත්හරිමින් සිටිති. කෙසේ හෝ අතලොස්සක් පමණක් තවමත් උඩුගම් බලා පිහිනමින් සිටිති. මුදල් සහ බලය මත සියල්ල රඳා පවතින වත්මන් සමාජයේ මිනිසුන්ට දේවල් විඳින්නට කාලය උගහටය. එබැවින් කලා රසය යන්න හුදෙක් පම්පෝරි ගැසීමකට පමණක් සීමා වෙමින් පවතියි.

සියලු කලා රසයන් ගිලෙමින් පවතින යුගයක ලිංගික රසය සීඝ්‍රයෙන් උද්දීපනය වෙමින් පැවතීම පුදුම එළවන්නක්ද නොවේ. කලා රසයකින් ලබන ගොළුබෙලි වින්දනයට වඩා ලිංගික උත්කර්ශයෙන් මානවයාට ලැබෙන ක්ෂණික සහනය නූතන සමාජය වසංගතයක් මෙන් ආක්‍රමණය කෙරෙමින් තිබේ. වයස් භේදයකින් හෝ ලිංග භේදයකින් තොරව සියලු පීඩනයන්ගෙන් ඉහිල්වීමට ලිංගික සහනය බොහෝ උපකාරී වෙත්. එසේ නැතහොත් මේ හැල්මේ දුවන්නෝ එසේ සිතත්.

“ස්පෙයාවීලය” නමින් සමාජයේ වහරණ, විවාහයට අමතරව ගෙන යන (ලිංගික) සම්බන්ධතාවය බොහෝ පොදු කාරණයක්, සත්‍ය ලෙසම ප්‍රසිද්ධ රහසක් ලෙසින් සංස්කෘතික බැමි සිදුරුවලින් රිංගමින් කරළියේ පෙරළි කරයි. “ඇත්තෝ” නිහඬවම ස්පෙයාවීලයත් සමඟින් රමණයේ යෙදෙනාතර ආසයි බයයි අදියරේ සිටින්නෝ තවමත් අකුල් හෙළීමේ ව්‍යාපෘති දියත් කරමින් ස්වයං වින්දනයේ යෙදෙති. ඔවුන් අතරින් ශුද්ධවන්ත පුරුෂයෝ සමාජශීලී ගැහැණිය බඩුවක් ලෙස හංවඩු ගසමින් සදාචාරය කරපින්නාගෙන දත්කූරු කමින් සිටින විට පත්තිනි මවුන්ගේ සෙයියාවෙන් සිටිනා කාන්තාවෝ සමාජශීලී ගැහැණිය වේසාවියක් කරමින් තවදුරටත් නවගුණ වැලම ගනිමින් සිටිති.

මෙය කෙසේ සිදුවුවත් ස්පෙයාවීලයන් අතරින් විවිධ වර්ගයේ රැළි මතුවෙමින් පවතින අතර ඉන් වඩා ජනප්‍රිය වන්නේ වයස් පරතරය ඉතා ඈතින් පිහිටා ඇති සබඳතාවයන්ය. බොහෝ ලාබාල තරුණයන් වයසින් වැඩි කාන්තාවන්ගේ ඇසුර ප්‍රිය කරන අතරම වයසින් අඩු කාන්තාවන් වියපත් තරුණයන් කරා ඇදීයාම ඒ රැළිවලට උදාහරණය.

මේ උපසංස්කෘතියේ කඩඉමේ සිට බලන්නෙකුට මෙම සබඳතා අතිශයින්ම ලිංගික ක්‍රියාවලියේ සක්‍රීයතාවයන් මතම සිදුවන කාරියක් පමණක් ම යැයි බැහැරලීමට හැකියාව ඇතත් යම් යම් මානුෂීය හේතුපාඨයන් මේ හා ඈඳෙමින් පවතියි. මෙම සබඳතා ගණන්ගත හැකි කාලපරිච්ඡේදයන් පසුකරන අවස්ථා ද නැත්තේ ම නොවේ. උදාහරණයක් ලෙස තරුණයන් පරිණත කාන්තාවන්ගේ ඇසුර ප්‍රිය කිරීමට මූලිකම හේතුව වන්නේ එම කාන්තාවන් විසින්ම සියලු වගකීම් දරන බැවිණ. එසේම මනා අවබෝධයක් ඇති නිසාවෙන් තහංචි සහ නීති රීති වලින් තොරවූ සැහැල්ලු සබඳතාවයක් ගෙනයාමේ තල්ලුව, යමක් කථාකොට විසඳාගැනීමේ නැමියාව මේ කාන්තාවන්ගෙන් නිබඳවම ලැබෙයි. එසේම ඔවුන්ගෙන් බොහෝ විට මවකගේ රැකවරණය තරුණයාට ලබාගත හැකි වීමත් (මෙහිදී මනෝවිද්‍යාත්මක කාරණවක් ද සඵල වෙතැයි සිතිය හැකිය.)හේතුකාරණා ලෙස දැක්වීමට හැකිය. ගැටළුවක දී ඇයගෙන් වන මැදිහත්වීම, මුදල්මය කාරණාවලදී අතහිත ලැබීමද විශේෂ කාරණා වෙයි. අනෙක් පසින් මේරූ කාන්තාවන් තරුණයන්ගෙන් උපරිම ලිංගික සංතර්පණයක් ලබනවා සේම සම වයසේ පිරිමියෙකුගෙන් ලැබිය නොහැකි ඉඟි බිඟි ආල ලීල පෑම්වලට මේ මේරූ කතුන් ලොල්වීම ද සිදුවෙයි. භාවලීලය වැඩි කාන්තාවන් තරුණයාට යත්වීමට ප්‍රිය කරන්නාසේම මෝරා වැඩුණු කාන්තාවෝ ගැටවරයන් පාලනයකිරීමෙන් ද තෘප්තියක් ලබති.

එහෙත් වයස්ගත පුරුෂයන්ගේ ඇසුර සොයන බොහෝ තරුණියන්ගේ ප්‍රධාන අරමුණ වන්නේ තමාට නොමසුරුව වියදම් කරවාගැනීමයි. කොටින්ම කියතහොත් ඇවිදින Credit කාඩ් පතකි. (මතක තබාගන්න එය ATM කාඩ් පතක් නම් නොවේ). තරුණයෙකුගෙන් ලබනවාට වඩා බොහෝ වරප්‍රසාද මේ තරුණියන්ට වියපත් බඹරුන්ගෙන් ලබාගැනීමේ හැකියාව උපරිමය. මෙහිදීද පියෙකුගේ රැකවරණය, ගැටළුවලදී ඉතාමත් සුරක්ෂිත සහ සාර්ථක විසඳුම් ලබාගැනීමටද මෙම තරුණියන්ට අවස්ථාව සැලසේ. තරුණයෙකුට වඩා ජීවිතයේ අද්දැකීම් බහුල බැවින් පැසුණු පුද්ගලයන්ගේ ඉවසීමේ ගුණය තරුණියන්ට සහනයක්ම ගෙන දෙයි. ඔවුන්ගේ කන්කෙඳිරි ගෑම්, නොනවත්වා කියවීම්, පුහුමාන්නය වැනි ඉතා පොදු කාරණා මෙන්ම අධ්‍යාපනය සම්බන්ධ කාරණා සහ රැකියා සම්බන්ධ කාරණාවන් වලදී ද තරුණයන්ට වඩා වාසි සහගත ඉඩ ප්‍රස්ථා ඇතිකරලීමට මේ පුරුෂයන් සමත්වෙති. මේ වියපත් පෙම්වතුන් බොහොමයක් තිරිහන්වීමේ මානසිකත්වය සහ නැතිවී යන ජවය නැවත ලබාගැනීමේ අරමුණින්ද, ධනාත්මක මානසිකත්වය නැවත ලබාගැනීමේ අරමුණින්ද, පරිපූර්ණ ලිංගික ආස්වාදයක් ලැබීමේ අරමුණින්ද, තම හැකියාවන් තවදුරටත් යාවත්කාලීන කිරීමෙන් ලබන මාන්නයත් කරණකොට ගෙන තරුණියන්ට නොමසුරුව අනුග්‍රහය දක්වමින් මේ සබඳතා නඩත්තු කරමින් සිටිති. එපමණක් නොවේ සමාජයෙන් කොන් වෙමින් තිබූ තම පෞරුෂය නැවත සමාජගතකිරීමේ අරමුණ ද මොවුන්ට නැත්තේම නොවේ.

මේවාට අමතරව ඉමක් කොනක් නොමැතිව අතපසුවූ ලිංගික ක්‍රියාවලිය සමනය කරගැනීමේ පරම අභිලාෂයෙන් පමණක්ම තමන්ට රුචියෙක් සමඟ තාවකාලික පළහිලවු පටලවා ගැනීමත් සුලබ කටයුත්තකි. අතට අසුවන මානයේ කවුරුන් හෝ ඩැහැගැනීම මූලික ලක්ෂණයකි. මේ සබඳතා ඉතාමත් සරල වන අතර බැඳීමේ මුඛ්‍ය පරමාර්ථය ලිංගිකත්වයම පමණකි. එහෙත් මේ අතර තවත් පිරිසක් විසින් කථාබහ කිරීමට හැක්කෙක් සොයාගැනීම මඟින් තමන්ගේ පීඩාවන් නිදහස්කර ගැනීමේ කාර්යය දෙයාකාරයකින් සිදුකරගනියි. කාරිය කරගැනීමට අමතරව වැදගත් තාලයේ කථාවක් කිරීම මගින් මානසික සහනයක්ද ප්‍රසාද දීමනාවක් ලෙස ලැබිය හැකි වීම මෙහිලා විශේෂ වේ. මෙවැනි සබඳතා අතර සාමාන්‍යාකාරයක ඇයි හොඳයියක් පැවතීම සිදුවෙයි. එකිනෙකාට ගරුකිරීමක් ශිෂ්ඨසම්පන්න ගතියක්ද නඩත්තු කරයි. කෙටිකාලීන වන අතර හුදු ලිංගිකත්වය උදෙසාම නොවූවද තම පුද්ගලිකත්ව මෙම සබඳතාවලින් ඈත්කර තබාගැනීමට බොහෝ දෙනෙක් වගබලාගනිති. අත්හැරීම් නිතර සිදුවුවද පසු අමනාපයන් කිසිවක්ම නොවන බැවින් වගකීම්වලින් 100%ක්ම දෙපාර්ශ්වයම නිදහස්වේ.

මේ සියලු ස්පෙයාවීල් අතර මිතුරන් අතරේ පමණක් වන සබඳතාත් දැකිය හැකිවෙයි.මිතුරුකම ඒ ආකාරයෙන්ම පවත්වාගැනීමත් අවශ්‍ය විටෙක ශාරීරික උවමනාවන් සරිකර ගැනීමටත් මේ මිතුරුකම් යොදා ගැනෙයි. එකිනෙකාගේ හැඟීම් අනෙකා විසින් අවබෝධකර ගැනීමත් එයට අවශ්‍ය පසුබිම සකස්කර ගැනීමත් ඉබේම වාගේ සිදුවෙයි. නිහඬ අනුමැති අනුව සියල්ල සිදුවුවද ඒවා අතර ගැටලු පැන නොනගියි. තමාගේ කොටස්කරුවා විශ්වාසවන්ත මිත්‍රයා වීම නිසා අනතුරුදායක තත්වය අඩුය. අතරින් පතර විරාගික සබඳතා ද දැක්ක හැකිය. ඔවුන් අතරේ කිසිඳු ලිංගික බැඳීමක් ඇති නොවන නිසා හුදු වාචික අදහස් හා හැඟීම් හුවමාරුවකට පමණක්ම සීමා වෙයි. එසේම ඔවුන් දැඩි ලිංගික පීඩනයක් පාලනය කිරීම මගින් වෙනත් ආකාරයක වින්දයක් ලබන්නෝ වෙති. මානසික පීඩා අඩුබැවින් ඉතාමත් දැහැමෙන් සෙමෙන් පවත්වාගනු ලබන සබඳතාවකි මෙය.

මෙසේ විවිධ වූ ස්පෙයාවීල් මෙරට සීඝ්‍රයෙන් ව්‍යාප්ත වුවද තවමත් වැදි යුගයේ මානසිකත්වයන් උරින් දරා සිටින්නන් බහුල බැවින් මඩ ගැසීම්, පවුල්කඩා ඉහිරවීම්, කාර්යාලවලදී වක්‍රාකාරව වෘත්තීමය පහර දීම්, බ්ලැක්මේල් කිරීම්, ලිංගික අඩන්තේට්ටම් සහ අවසන මිනීමරාගැනීම්ද පොදුවෙමින් සිදුවෙමින් පැවතීම කණගාටුවට කරුණකි.

එසේම සීමාවන් ඉක්මවා යාම නිසා බොහෝවිට නැති පශ්න ඇතිවීම ද බලාපොරොත්තු විය හැකිය. මේ සියල්ල පසෙකලා ස්පෙයාවීලය ද තල්ලුකර ගෙනයමින් තමන්ගේ ජීවිතය ද නිදහසේ ගෙවමින් ඉතා හොඳින් තම පවුල ද නඩත්තු කරගන්නෝ බොහෝමයක් සිටිති. ඇත්තෙන්ම අපේ කාලයේ මහෞෂධ පඬිවරු ඔවුහු වෙත්. සරල සුගම න්‍යායන් තම ජීවිතයේ අවශේෂ කාරණයන්ට ආදේශ කරගැනීමෙන් උපරිම ඵලයක් ලැබීමට තරම් ඔවුහු දක්ෂය. බෙල්ලේ බැඳගෙන කෑම පසෙකලා අතමානයෙන් තබාගෙන රස බැලීම නිසා ජීවිතය විඳින්නෝ මොවුහුය. මෙහි හරි වැරැද්ද කෙසේවෙතත් පොදු මිනිස් ජීවිත විඳවීම්වලින් හෙම්බත්ව පොළවට පස්වීමට වඩා තැනේ හැටියට ඇණගැසීමට දතයුතු බව නොකිවමනා ය.

One Comment

  1. amila says:

    Honda lipiyak.. Samajaye sebe thathwaya awaboda kra ganna wtina lipiyak