යෝධයෙකු වූ මිනිසා සමුගනියි!

අප රටෙහි සංස්කෘතික භාණ්ඩාගාරයේ වටිනා වස්තුවක් ලෙස සැලකිය හැකි නාරාවිල පැට්රික් මහතා අභාවප්‍රාප්ත ව ඇත. වචනයෙහි පරිසමාප්තයෙන් ම ප්‍රවීණ ලේඛකයෙකු වූ එතුමෝ සිංහල සාහිත්‍ය වංශය වෙත දායාද කළ කෘති අතිමහත් සංඛ්‍යාවකි. ඒ අතරින් සංස්කෘත බසින් සිංහලයට පරිවර්තනය කළ “මේඝ දූතය” ප්‍රධාන වෙයි.   “කුමාර සම්භව”, “ඍග්වේද ගීතාවලී” කෘති ද සිංහලට පරිවර්තනය කළේ ය. ශාස්ත්‍රාලයීය වටාපිටාවෙන් නොව ස්වයං අධ්‍යනයෙන් බොහෝ දෑ උගත් ඔහු සංස්කෘත භාෂාව ද උගත්තේ එලෙසිනැ යි කියැවෙයි.

කමලා මාර්කන්ඩේගේ කෘතියක් “නොරඳන අමාදිය” , මැද පෙරදිග කෙටිකතා ඇතුළත් “අවු ගිනි දැල්”, මෙරට බොහෝ ප්‍රකට වූ සෝවියට් කෘතියක් වන “මිනිසා යෝධයෙකු වූයේ කෙසේ ද?”  “මතිගාරි”, “විප්ලවාංකූරෝ”, “මිනිසා කෙරෙහි ග්‍රහ බලපෑම්”, “මානව සංහතියේ වරිග”, යනාදී වශයෙන් ඔහු ගණනින් සහ ගුණයන් විශාල පොත් ගණනාවක් පළ කළේ ය. “දනිමි ස්වාමිනී හැ‍ඳින්නෙමි ස්වාමිනී”  යනු ඔහුගේ ස්වයංලිඛිත චරිතාපදානය යි.

සිංහල සාහිත්‍ය වංශකතාවට මෙබඳු මෙහෙයක් කළ නාරාවිල පැට්රික් මහතා වෙත අපගේ ගෞරවය මෙසේ පුද කරමු.

 

 

One Comment

  1. indumathi adikari says:

    අතිශයින් ප්‍රිය කළ ලේඛකයෙකි .එතුමාට නිවන් සුව පතමි .